Lúkatsjenkó talinn öruggur um sigur

Forsetakosningar fara fram í Hvíta-Rússlandi í dag. Kjörstaðir voru opnaðir snemma í morgun og voru þá þegar teknar að myndast raðir fyrir utan þá.

Ekki eru nokkrar líkur taldar á öðru en að Alexander Lúkatsjenkó, sitjandi forseti, fari með sigur af hólmi enda gera sér fáir grillur um að kosningarnar fari fram á sanngjarnan hátt. Andstæðingar forsetans ætla að standa fyrir mótmælum í höfuðborginni Minsk í dag en þau verða afar friðsamleg enda óttast þeir að Lúkatsjenkó muni að öðrum kosti siga á þá öryggislögreglunni KGB.