Textílverkamenn létu lífið þegar bygging hrundi

Að minnsta kosti 9 létu lífið og um 50 slösuðust þegar textílverksmiðja hrundi í Dhaka, höfuðborg Bangladesh, í morgun.

Um 150 manns voru að störfum í verksmiðjunni þegar hún tók að gefa sig. Ekki er vitað hver margir liggi fastir í rúsunum og leita björgunarsveitarmenn eftirlifenda þar. Óvíst er hvort nokkur eigi eftir að finnast á lífi. Ekki liggur fyrir á þessari stundu hvað olli því að byggingin hrundi.

Þetta er annað mannskæða slysið í textílverksmiðju í Bangladesh á þremur dögum. Í fyrradag létu 54 verkamenn lífið og minnst 60 slösuðust þegar eldur kviknaði í textílverksmiðju í í hafnarborginni Chittagong.

Vefnaðarvörur eru helsta útflutningsvara Bangladessa og tryggja landinu jafnvirði rúmlega 400 millljarða íslenskra króna í tekjur á ári hverju.