Pearce ber mikla virðingu fyrir Ferguson

Stuart Pearce, stjóri Manchester City, hrósaði kollega sínum Alex Ferguson í hástert í dag þegar hann var spurður út í leik liðsins gegn Manchester United á morgun. Pearce segir aðdáunarvert hvernig Ferguson hafi komið United á toppinn á ný þrátt fyrir harða gagnrýni.

"Það er ótrúlegt hvað Ferguson hefur náð að rífa liðið upp og koma því á toppinn enn eina ferðina, ekki síst þegar maður horfir til þess að hann er búinn að vera stjóri liðsins í 20 ár. Maður getur ekki annað en borið virðingu fyrir því hvernig honum tekst alltaf að snúa á þá sem efast um getu hans og það segir sína sögu um hæfileika hans að hann skuli vera með liðið á toppnum núna. Í upphafi tímabils hefði ég líklega sagt að Arsenal spilaði skemmtilegasta fótboltann í deildinni, en Manchester United er klárlega að spila besta boltann í dag að mínu mati," sagði Pearce.