Faðir leikmanns fékk hjartaáfall og lést

Hörmulegt atvik átti sér stað í viðureign Tenerife og Ponferradina í spænsku 2. deildinni í gær þegar faðir eins leikmanns Tenerife fékk hjartaáfall er hann horfði á leikinn úr áhorfastúkunum og lést.

Atvikið átti sér stað í fyrri hálfleik og fékk þjálfari Tenerife, Bernd Krauss, spurnir af því hvað hefði gerst. Hann lét leikmanninn, Manuel Castineiras, ekki vita af því sem gerst hafði í fyrstu, enda reyndu læknar að lífga föðurinn við í dágóða stund.

Þegar faðirinn hafði verið úrskurðaður látinn var Castineiras tekinn af velli og honum tjáð fréttirnar í búningsklefa liðsins. "Okkar hugur er með Manuel og fjölskyldu hans. Þetta er hörmulegt," sagði Krauss eftir leikinn, en Tenerife tapaði leiknum 1-0.