Kennum okkur sjálfum um tapið

Ryan Giggs, leikmaður Manchester United, segir að tap liðsins gegn Celtic í Meistaradeildinni í gærkvöld sé engum öðrum að kenna en leikmönnunum sjálfum, sem hafi fengið á baukinn fyrir að nýta ekki færin sín. Hann hefur ekki stórar áhyggjur af því að mæta Benfica í lokaleiknum í riðlakeppninni.

"Við getum ekki kennt neinum öðrum en sjálfum okkur um þetta tap. Við vorum miklu betra liðið á vellinum og þeir komust vart yfir miðju í fyrri hálfleiknum, en maður verður að nýta færin sín - annars fer illa.

Nú verðum við að mæta Benfica aftur og þar verðum við að gjöra svo vel að ná í stig, annars sitjum við eftir. Ég held samt að við séum í ágætri stöðu, því þeir þurfa á sigri að halda og verða því að sækja gegn okkur á Old Trafford. Við vitum nákvæmlega hvað við þurfum að gera," sagði hinn reyndi kantmaður United.