Óhagstætt að selja Hargreaves

Karl-Heinz Rummenigge, stjórnarformaður Þýskalandsmeistara Bayern Munchen, segir að félagið vilji ekki selja enska landsliðsmanninn Owen Hargreaves því skattalög í landinu geri það að verkum að það hreinlega borgi sig ekki.

"Við höfum hugsað málið vandlega og ef svo færi að við seldum hann, myndi enginn nema skatturinn græða á því - jafnvel þó við fengjum allt að 30 milljónir evra fyrir hann," sagði Rummenigge, en bætti við að þar fyrir utan hefði félagið engan áhuga á að selja leikmanninn yfir höfuð. Hargreaves stóð sig mjög vel með enska landsliðinu á HM í sumar og hefur Manchester United verið lengi á höttunum eftir leikmanninum.