Vestræn ríki verða að búa sig undir aukin elliglöp

Breskir vísindamenn vara við því í nýútkominni skýrslu að vestræn samfélög ættu að undirbúa aukna aðstöðu og aðstoð við aldrað fólk með elliglöp eða hrörnunarsjúkdóma sem leggjast á heila, út af því að batnandi lífskjör og lífslíkur hafa það í för með sér að fleira og fleira fólk nær háum aldri með bilandi heilastarfsemi.

Vísindamennirnir rannsökuðu einnig hvaða þættir hefðu mest áhrif á það hvort fólk þjáðist af elliglöpum. Fólk sem býr að lengri menntun og hærri þjóðfélagsstöðu þjáist síður af elliglöpum en vísindamennirnir bentu einnig á að sá þjóðfélagshópur lifi einnig að meðaltali lengur, þannig að áhrifin af menntun og þjóðfélagsstöðu þurrkist út þegar litið er á heildarútkomuna.

Rannsóknin byggist á úrtaki 13.004 karla og kvenna yfir 65 ára aldri sem býr í Englandi og Wales. Líkurnar á því að heilastarfsemin hefði eitthvað skerst áður en hjartað hætti að slá voru um það bil 30% og hækkuðu eftir því sem fólk lifði lengur. Aðeins 6% þeirra sem létust á aldursbilinu 65-69 ára þjáðust af einhvers konar elliglöpum en 58% þeirra sem urðu 95 ára eða eldri.