Ellefu ára fangelsi fyrir morð

23. febrúar 2006 21:04

Magnús Einarsson var í dag dæmdur í ellefu ára fangelsi fyrir að bana konunni sinni á heimili þeirra í Kópavogi í nóvember árið 2004. Hæstiréttur þyngdi fangelsisdóm héraðsdóms yfir Magnúsi um tvö ár. Magnús var ákærður fyrir að bregða þvottasnúru um háls Sæunnar á heimili þeirra í Hamraborg í Kópavogi og þrengja síðan að þannig að hún lést af völdum kyrkingar. Börn þeirra tvö voru sofandi í íbúðinni á sama tíma. Magnús játaði að hafa banað konu sinni, en afbrýðisemi vegna framhjálds konu hans hafi valdið því að hann missti stjórn á sér.

Í dómi Hæstaréttar segir að Magnús hafi sagt sjálfur til brots síns og samkvæmt gögnum málsins sýnt iðrun. Hann sé einn til frásagnar um hvað hafi farið þeim hjónum á milli umrædda nótt. Héraðsdómur hafi metið þá frásögn í höfuðdráttum trúverðuga og endurskoðaði Hæstiréttur ekki það mat. Þegar kom að því að ákveða refsingu leit Hæstiréttur til 1.mgr. 70. greinar hegningarlaga sem segir að taka skuli til greina hversu mikilvægt það er sem brotið hefur beinst að og segir dómurinn að ekki verði framhjá því litið hversu alvarlegt brotið sé. Þrátt fyrir það megi miða til refsilækkunar að Magnús hafi greint frá brotinu og hann hafi sýnt iðrun. Eins megi ætla, miðað við geðrannsókn sem gerð var á Magnúsi að andlegt ástand hans fyrir og eftir verknaðinn atburðarrásina og hafi afbrýðisemi og niðurlæging orðið til þess að innibyrgð reiði hans hafi brotist út. Hæstiréttur mat því hæfilega refsingu 11 ár. Hann staðfesti ákvörðun héraðsdóms um bætur, en Magnús Einarsson var dæmdur til að greiða börnum sínum og foreldrum Sæunnar rúmar 13 milljónir króna í bætur.

Fréttir Innlent

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir