Tekist á um myndir af Múhameð

Þekktir blaðamenn tókust á um myndbirtingar af Múhameð spámanni í fjölmiðlum á pressukvöldi Blaðamannafélagsins í kvöld en það er vettvangur félagsmanna til umræðna um málefni líðandi stundar.

Umræðuefnið að þessu sinni var árekstur menningarheima í tengslum við birtingu Jótlandspóstsins á skopmyndum af Múhameð spámanni sem hefur verið eitt heitasta umræðuefnið í heiminum um þessar mundir.

Skiptar skoðanir voru á því hvort myndbirtingarnar hafi átt rétt á sér og hvort rétt væri að birta myndirnar nú til að varðveita tjáningarfrelsið. Á fundinum kom meðal annars fram að mikilvægt væri að láta ekki hótanir eða ofbeldi ráða því hvað birt væri hverju sinni enda væri þetta ekki í fyrsta skipti sem múslimar beita ofbeldi vegna birtingar á efni sem þeim þætti óviðeigandi. Í því sambandi var minnt á morðið á Theo Van Gogh sem myrtur var í Hollandi vegna kvikmyndar sinnar. Eins kom fram að það væri aðeins lítill minnihlutahópur múslima sem hefur haft í hótunum eða beitt ofbeldi vegna myndbirtingarinnar og af tillitsemi við meirihluta múslima ætti ekki að birta myndirnar. Flestir voru sammála því að umræðan um myndbirtinguna væri nauðsynleg og ganleg öllum.