Sirleaf tekin við í Líberíu

Ellen Johnson-Sirleaf sór í dag embættiseið sem forseti Líberíu í höfuðborginni Monróvíu, en hún er fyrst afrískra kvenna til að gegna leiðtogahlutverki í landi sínu. Þúsundir fylgdust með athöfninni, þeirra á meðal leiðtogar ýmissa annarra Afríkuríkja ásamt bæði forsetafrú og utanríkisráðherrra Bandaríkjanna. Sirleaf, sem sigraði fyrrverandi knattspyrnuhetjuna George Weah í forsetakosningum í nóvember síðastliðnum, bíða mörg erfið verkefni. Hún hefur sagt það markmið sitt að endurvekja von í landinu, en innviðir samfélagsins eru í molum eftir áralanga borgarastyrjöld og spillingu.