Enn átök fyrir Rolling Stones tónleika

Að minnsta kosti 20 slösuðust og 50 voru handteknir þegar til átaka kom milli lögreglu og æstra aðdáenda hljómsveitarinnar Rolling Stones í Buenos Aires í Argentínu í gær, annað kvöldið í röð.

Hljómleikar hljómsveitarinnar voru haldnir á gríðarstórum knattspyrnuleikvangi. Hávaðasamur og áflogagjarn hópur aðdáenda reyndi að komast inn á hljómleikasvæðið án aðgöngumiða nokkru fyrir upphaf tónleikanna. Lögregla meinaði þeim inngöngu.

Aðdáendurnir svöru með því að grýta grjóti og flöskum að lögreglu, sem greip þá til þess ráðs að úða vatni á æstan múginn, skjóta á hann gúmmikúlum og berja æstustu aðdáendurna með kylfum.

Öryggisgæsla við tónleikastaðinn hafði verið hert í gær eftir að til átaka kom fyrir tónleika Rolling Stones í borginni í fyrrakvöld.