Færeyingar reiðir Íslendingum

Reiði ríkir í Færeyjum vegna umræðu um bágborna stöðu samkynhneigðra í eyjunum en Íslendingar vöktu athygli á málinu á þingi Norðurlandaráðs. Óttast er að umræðan geti jafnvel orðið til að skaða réttindabaráttu homma og lesbía í Færeyjum.

Á þingi Norðurlandaráðs í vikunni fór Rannveig Guðmundsdótti alþingismaður fyrir hópi þingfulltrúa sem skoraði á færeyska lögþingið að bæta réttarstöðu samkynhneigðra í landinu. Samkynhneigðir njóta þar ekki sérstakrar verndar gegn mismunun eins og annars staðar á Norðurlöndunum og nýleg dæmi eru um að samkynhneigt fólk hafi orðið fyrir ofbeldi í Færeyjum. Fulltrúi færeyskra íhaldsmanna á Norðurlandaráðsþinginu brást reiður við áskoruninni og sagði Rannveigu hafa með henni móðgað Færeyinga. Málið hefur að vonum vakið talsverða athygli í Færeyjum og þar telja margir að verið sé að hlutast til um innanríkismál.

Ræða á frumvarp um stöðu samkynhneigðra á færeyska lögþinginu í næstu viku. Elís Poulsen, fréttamaður í Þórshöfn, sagði í samtali við NFS óttast að flótti væri brostinn í þann meirihluti sem virtist tryggur til að gera frumvarpið að lögum.