Engar bætur fyrir fótamissi

Pólskur maður, sem missti af báðum fótum eftir að hafa fengið blóðeitrun síðasta sumar við vinnu hér á landi, hefur lent á milli þils og veggjar í kerfinu og fær engar tryggingabætur. Átján ára sonur mannsins kom til landsins fyrir viku til að aðstoða hann og létta honum lífið.

Irek Glevchowski kom hingað til lands síðasta vor til þess að vinna og hóf hann störf hjá Jarðvélum. Irek taldi sig hafa full atvinnuréttindi enda hafði hann fengið kennitölu hjá þjóðskránni og vinnuveitendur hans athuguðu málið ekki frekar og var hann ráðinn í vinnu. Irek var að þrífa ruslagám skammt frá Borgarnesi þegar hann sýktist og fékk blóðeitrun en það vissi hann ekki strax heldur hélt hann að um venjuleg veikindi væri að ræða.

Irek var í gjörgæslu í sex vikur og var honum vart hugað líf. Rauði krossinn greiddi flugfar fyrir ættingja hans þegar hann var sem verst staddur. Irek sem var hraustur fyrir náði sér en til að vinna bug á blóðeitruninni þurfti að taka af báðum fótum hans. Eins þurfti að fjarlægja annað nýrað og hann missti heyrn á öðru eyra. Rúmum tveimur mánuðum eftir slysið man Irek fyrst eftir sér að ráði og nú hefur hann verið samtals átta mánuði á sjúkrahúsi. Nú er hann í endurhæfingu á Grensás þar sem hann er að læra að ganga á gervifótum frá Össuri.

Irek greiddi sjálfur fyrir flugfar sonarins til landsins og segir hann fjárhagsstöðuna fara síversnandi frá því hann slasaðist. Hann vonast til að sonur hans fái vinnu hér á landi svo hann geti séð fyrir þeim því nánast allt sparifé þeirra er búið. Efling vinnur að því finna lausn á málum Ireks en hún er ekki í sjónmáli og er framtíð hans því í mikilli óvissu.