Ákveðið í dag hvort Öryggisráð SÞ tekur á málinu

Alþjóða kjarnorkumálastofnunin ákveður í dag hvort kjarnorkuþróun Írana verður vísað fyrir Öryggisráð Sameinuðu þjóðanna. Ríkisstjórn Írans hótar enn frekari auðgun úrans ef ákveðið verður að vísa málinu fyrir öryggisráðið.

Mohamed El Baradei, yfirmaður Alþjóða kjarnorkumálastofnunarinnar, segist gera sér vonir um að hægt verði að semja við Írana um kjarnorkuáætlun þeirra áður en vikan er úti. Telur hann viðræður fulltrúa Rússa og Evrópusambandsins vísbendingu í þá átt.

Aðalsamningamaður Íransstjórnar sagði í gær að Íranar myndu ekki láta vestræn stórveldi vaða yfir sig og ef eitthvað væri myndu þeir leggja enn meira púður en áður í auðgun úrans ef ákveðið yrði að vísa malefnum landsins fyrir öryggisráð Sameinuðu Þjóðanna. Kjarnorkuþróun væri Írönum nauðsynleg, auk þess að væri væri sjálfsagður réttur þeirra að þróa kjarnorku.

Svoleiðis líta þær þjóðir sem eiga fast sæti í öryggisráðinu ekki á málið og þar ríkir nú samstaða um að gera eitthvað í málunum. Rússar og Kínverjar fóru fram á það í byrjun febrúar að Írönum yrði gefinn frestur til að gera hreint fyrir sínum dyrum. Nú er sá frestur liðinn, án þess að neitt hafi þokast í samningsátt.

Skilaboðin frá stjórnvöldum í Íran hafa verið skýr og það kom berlega í ljós á fundi þeirra með fulltrúum stórvelda Evrópu fyrir helgina, þar sem samningamaður þeirra sagði það ekkert annað en yfirgang að ætla að vísa málinu fyrir öryggisráðið.

Fæst bendir til að það komi til greina að fara með hervaldi gegn Íran í bráð, en stjórnmálaskýrendur segja allt benda til að samþykkt verði að beita landið efnahagslegum þvingunum til að byrja með í því augnamiði að reyna að fá Íransstjórn ofan af auðgun úrans og þróun kjarnorku.