Meiri áhætta að fara ekki í stóriðjuuppbyggingu

Þórður Friðjónsson, forstjóri Kauphallar Íslands, segir meiri áhættu tekna fyrir íslenskt efnahagslíf með því að fara ekki í stóriðjuuppbyggingu. Hann telur verkefnið vel viðráðanlegt út frá hagstjórn og að of mikið sé gert úr hættu sem því fylgi. Ný skoðanakönnun sýnir að 56 prósent þeirra sem afstöðu taka séu hlynnt frekari uppbyggingu áliðnaðar í landinu.

Stóriðjumálin eru í bennidepli þessa dagana sem lýsir sér í því að yfir 300 manns mættu í dag til ráðstefnu sem Samtök atvinnulífsins stóðu fyrir um gildi ál- og orkuframleiðslu á Íslandi. Að þessu sinni vöktuðu óeinkennisklæddir lögreglumenn og öryggisverðir frá einkafyrirtækjum fundarstaðinn en það var einmitt á álráðstefnu í þessu sama húsi í fyrrasumar sem grænni skyrblöndu var slett á fundarmenn. Menn töldu sig reyndar sjá þrjá af skyrslettumönnunum meðal fundarmanna í dag en hann var öllum opinn og allt fór fram með friði og spekt.

Fulltrúi frá Gallup birti niðurstöður könnunar sem gerð var að beiðni Samtaka atvinnulífsins í nóvember þar sem almennt kemur fram jákvætt viðhorf landsmanna til ál- og orkufyrirtækja. Spurðir um viðhorf gagnvart frekari uppbyggingu áliðnaðar sögðust um 37 prósent vera ýmist andvíg eða mjög andvíg, 48 prósent hlynnt eða mjög hlynnt en um 15 prósent tóku ekki afstöðu. Ef þeim er sleppt var útkoman sú að um 44 prósent eru andvíg eða mjög andvíg en 56 prósent hlynnt eða mjög hlynnt frekari uppbyggingu áliðnaðar.

Þórður Friðjónsson, forstjóri Kauphallar Íslands, var meðal frummælenda en hann fjallaði um stóriðjuuppbygggingu út frá hagstjórnarvanda. Sagði hann um frekari stóriðjuuppbyggingu vel viðráðanlega og að það væri að mörgu leyti of mikið gert úr þessari hættu. Það væri ekkert náttúrulögmál að efnahagurinn tæki einhvern kollhnís eins og oft hefur gerst áður. Þó taldi hann að vissulega gæti fylgt þessu áhætta en sagði meiri áhættu tekna með því að fara ekki í þessar fjárfestingar.