Lofa þeim gulli sem myrða danska hermenn

Uppreisnarmenn úr röðum talíbana í Afganistan hafa lofað fimm kílóum af gulli hverjum þeim sem myrðir danskan hermann í landinu. Þá er þeim sem myrðir einn af teiknurunum sem gerðu skopteikningarnar af Múhameð spámanni, og birtust í danska dagblaðinu Jyllands-Posten, lofað eitt hundrað kílóum af gulli. Öfgasinnaðir múslimar hafa hótað hryðjuverkum í Danmörku að undanförnu og hvetja liðsmenn sína til að ráðast á Dani hvar sem þá er að finna.

Ræðismannsskrifstofu Dana í Túnis var lokað tímabundið í gær eftir að hringt var á skrifstofuna og starfsmanni þar sagt að koma sér í burtu. Ræðismaður Dana í Túnis sagði að maðurinn sem hringdi hafi ekki sagt til nafns en gripið hefði verið til aðgerðanna af varúðarástæðum vegna deilna sem blossað hafa upp að undanförnu.