Stöðva þarf ólöglegar veiðar

Einar K. Guðfinnsson sjávarútvegsráðherra lýsir fullum stuðningi við aðgerðir norsku strandgæslunnar gagnvart skipinu Joana sem fært var til hafnar í Noregi í gær vegna ólöglegra veiða fyrir norðan Noreg.

Reyndist skipið vera þjóðernislaust og engar merkingar voru á því um heimahöfn eða skráningarnúmer. Segir Einar mikilvægt að samstarf sé milli Noregs og Íslands gegn ólöglegum veiðum af þessu tagi og brýnt sé að grípa til aðgerða þegar um sé að ræða skip án þjóðernis.

Íslendingar eiga nú þegar mikið samstarf við Norðmenn og fleiri ríki hvað varðar svæðisbundið eftirlit með ýmsum hafsvæðum. Einna mest er samvinnan á hafsvæðinu úti fyrir Reykjaneshrygg en þar hafa verið og eru reglulega stundaðar ólöglegar karfaveiðar þó ekki hafi verið gripið til verulegra aðgerða hingað til.

Sjávarútvegsráðherrar Norður-Atlantshafsríkjanna ákváðu fyrir stuttu að stefna að sameiginlegum lista yfir skip sem stunda ólöglegar veiðar á Atlantshafinu öllu sem gæti skilað sér í hafnbanni á þau skip er þær veiðar stunda.