Gruna friðargæsluliða um nauðganir

Fleiri en þrjátíu mál sem tengjast nauðgunum, mútuþægni og skjalafalsi ásamt öðrum lög- og agabrotum starfsfólks friðargæslu Sameinuðu þjóðanna í Pristina í Kosovo eru nú til rannsóknar.

Það er innri endurskoðun Sameinuðu þjóðanna, OIOS, sem stýrir rannsókninni. Þetta kemur fram í tilkynningu frá Sameinuðu þjóðunum. Íslendingar hafa unnið við friðargæslu á flugvellinum í Pristina frá því árið 2002 og um tíma var flugvallarstjórnin í höndum Íslendinga.

Á blaðamannafundi hjá Sameinuðu þjóðunum fyrir helgi sagði Inga-Britt Ahlenius, aðstoðarframkvæmdastjóri hjá stofnuninni, að hún þekkti til þess að misferli hefði átt sér stað á flugvellinum, en hún hefði ekki haft bein afskipti af rannsóknum. Ahlenius gegndi áður starfi innri endurskoðanda í Kosovo. Endurskoðunarskýrslan var kynnt allsherjarnefnd Sameinuðu þjóðanna fyrir rúmri viku.

Samkvæmt því sem Fréttablaðið kemst næst hófust rannsóknir nar á meðan flugvöllurinn var enn undir stjórn Íslendinga. Þær rannsóknir hafi þó fyrst og fremst beinst að flugstöðvarhluta flugvallarins en hann hefur verið rekinn af heimamönnum. Í skýrslunni sem lögð var fyrir allsherjarnefndina er þó skýrt tekið fram að um sé að ræða brotlega hegðun friðargæsluliða Sameinuðu þjóðanna enda hefur allsherjarnefndin beðið um frekari rannsóknir á þessum málum og vinnur jafnframt að smíði regluverks og þjálfunar sem miði að því að hindra óhæfuverk af þessum toga í framtíðinni. Glæpasamtök hafa sterk ítök í viðskiptum á þessu svæði og talið er að þau teygi anga sína inn á flugvöllinn.

Leitað var umsagnar Hallgríms N. Sigurðssonar, varaframkvæmdastjóra flugmálastjórnar og fyrrum flugvallarstjóra í Pristina, en hann vildi ekki tjá sig opinberlega um málið.