Tekst ekki að ljúka hringvegi

Þrátt fyrir að 15 milljörðum króna af Símapeningum eigi að verja til vegamála á næstu fimm árum tekst ekki að ljúka malbikun hringvegarins. Samkvæmt langtímaáætlun til ársins 2014 á heldur ekki að klára hringinn fyrir þann tíma og virðist sem enn muni líða minnst áratugur þar til þau tímamót verða. Það ætlar að ganga hægt að eyða síðustu malarköflum hringvegarins. Aðeins einn þeirra hvarf í sumar. Það var kaflinn um Almannaskarð en með opnun jarðganga undir skarðið í lok júnímánaðar lengdist malbikið um fimm og hálfan kílómetra. Hringvegurinn telst nú 1335 kílómetra langur og er búið að leggja bundið slitlag á 95 prósent leiðarinnar. Eftir eru fimm malarkaflar, samtals 62 kílómetrar að lengd, og þeir eru allir á Austurlandi. Efst í Jökuldal, ofan Skjöldólfsstaða, vantar fimm kílómetra. Í Skriðdal og á Breiðdalsheiði er lengsti malarkafli hringvegarins, 41 kílómetra langur. Í Berufirði er átta kílómetra langur malarkafli, í Hamarsfirði vantar slitlag á þriggja kílómetra kafla og loks er í Þvottár- og Hvalnesskriðum fjögurra kílómetra malarkafli. Samkvæmt upplýsingum Vegagerðarinnar á Austurlandi er áformað að Jökuldalurinn klárist á næsta ári, Skriðurnar árið 2007, Hamarsfjörður árið 2008 og Berufjörður árið 2010. Stóra spurningin er kaflinn um Skriðdal og Breiðdalsheiði. Langtímaáætlun til ársins 2014 gerir ekki ráð fyrir að hann verði kláraður á þeim tíma og við ráðstöfun á söluandvirði Símans á dögunum var ekkert eyrnamerkt hringveginum. En það gæti verið önnur leið til að ljúka hringnum fyrr. Í svari við fyrirspurn á Alþingi fyrir hálfu öðru ári nefndi samgönguráðherra að rætt væri um það að færa hringveginn á Austurlandi þannig að hann lægi ekki um Breiðdalsheiði heldur um firðina og færi um jarðgöngin milli Fáskrúðsfjarðar og Reyðarfjarðar sem voru einmitt opnuð fyrir helgi. Slík færsla á hringveginum myndi þýða að öllum líkindum að hægt yrði að lýsa því yfir innan fimm ára að hringnum væri lokið. Jón Rögnvaldsson vegamálastjóri sagði hins vegar í gær að slík breyting á hringveginum yrði ekki gerð að svo stöddu.