Talsvert slasaður eftir bílveltu

Ökumaður flutningabíls, sem valt skammt frá Þverá í Þjórsárdal snemma í morgun, slasaðist talsvert. Maðurinn gekk á sokkaleistunum um tveggja og hálfs kílómetra leið að bænum Fossnesi til að láta vita af sér. Atvikið var tilkynnt til lögreglunnar á Selfossi um klukkan sex í morgun og var maðurinn fluttur á slysadeild Landspítalans til rannsóknar. Að sögn varðstjóra hjá lögreglunni á Selfossi er bíllinn gjörónýtur og með ólíkindum að maðurinn hafi lifað slysið af. Stýrishúsið er klesst niður og þykir líklegt að ökumaðurinn hafi kastast út úr bílnum þegar hann valt en talið er að bíllinn hafi farið tvær veltur.