Heimsfaraldur tímaspursmál

Flest virðist benda til að fuglaflensa geti smitast á milli manna og því spá vísindamenn að aðeins sé spurning um hvenær en ekki hvort heimsfaraldur breiðist út. Ekki þykir þó ástæða til að hækka viðbragðsstigið hérlendis enn sem komið er. Vísindamenn hvaðanæva að úr heiminum velta nú vöngum í höfuðstöðvum Alþjóðaheilbrigðismálastofnunarinnar WHO í Genf yfir því hvernig svonefnd fuglaflensa muni þróast. Allt virðist benda til að flensan muni á endanum geta smitast á milli manna þótt vísindamennirnir séu ekki vissir hvenær það mun gerast. Síðan í árslok 2003 hafa 37 manns látist úr flensunni í Víetnam, 12 í Taílandi og fjórir í Kambódíu. Fólkið virðist ekki hafa smitast af öðru fólki heldur borðað eða snert sýkt fuglakjöt. Dr. Klaus Stohr inflúensusérfræðingur hjá WHO sagði hins vegar í viðtali við AP-fréttastofuna í gær að mikilvægt væri að vera á varðbergi "Þau gögn sem við höfum virðast sýna að veiran er smám saman að breytast svo og smitleiðir hennar. Við vitum hins vegar ekki hvort faraldurinn muni hefjast í næstu viku eða á næsta ári. " Nýjustu rannsóknir benda til að nái veiran að stökkbreytast og smitast á milli manna muni það aðeins taka hana þrjá mánuði að dreifa sér út um allan heim. Þar sem breytingarnar á H5N1-veirunni eru í svo mörgum og stuttum skrefum er erfitt að meta á hvaða augnabliki heimsfaraldur sé í uppsiglingu. Ef gripið er til ráðstafana of snemma verður miklu fé sólundað að ástæðulausu en afleiðingarnar gætu orðið mjög alvarlegar verði of seint brugðist við útbreiðslu flensunnar. Hérlendis hefur svonefnt hækkað viðbúnaðarstig verið í gildi að undanförnu en þá er ný veira í umferð sem smitast á milli manna í einstaka tilvikum án þess að hún sé talin bráðsmitandi. Að sögn Guðrúnar Sigmundsdóttir, yfirlæknis á sóttvarnasviði landlæknisembættisins, geti vel verið að veiran þróist í þá átt en allt eins líklegt sé að hún deyi út. Því er ekki þörf á að auka viðbúnað enn sem komið er. "Við fylgjum ráðleggingum WHO um viðbragðsstig," segir Guðrún.