Lögreglan náði listaverkaþjófum

Þremur myndum norska myndlistarmannsins Edvards Munch var stolið af hóteli í Noregi í fyrrakvöld. Myndirnar eru metnar á yfir tuttugu milljónir íslenskra króna. Norska lögreglan komst fljótt á slóð þjófanna og í gærkvöld voru þeir handteknir. Iver Stensrud, talsmaður lögreglunnar, vildi ekki segja hversu margir hefðu verið handteknir. Hann sagði hins vegar að þeir væru fleiri en þrír og færri en tíu og að sumir þeirra hefðu áður komist í kast við lögin. Lögreglan lagði mikla áherslu á að ná þjófunum fljótlega því búist var við að auðvelt yrði fyrir þá á að selja myndirnar. Ekki liggur fyrir hvort myndirnar eru heilar eða skemmdar. Aðdragandi málsins var sá að seint á sunnudagskvöldið brutust tveir menn inn í matsal Hotel Refsnes Gods á Jeleyju, nærri Moss í suðurhluta Noregs. Höfðu þeir á brott með sér þrjár myndir meistarans. Um var að ræða eina vatnslitamynd sem heitir Blái kjóllinn, frá árinu 1915, og tvö steinþrykk, annað af leikskáldinu Strindberg og hitt af Munch sjálfum. Verðmæti Bláa kjólsins er áætlað ríflega tíu milljónir íslenskra króna en steinþrykkin eru metin á fimm milljónir hvort. Þetta var í annað skipti á rúmu hálfu ári sem verkum eftir Munch er stolið á bíræfinn hátt. Í ágúst í fyrra réðust þrír vopnaðir menn inn í Munch-safnið í Osló um hábjartan dag og tóku með sér útgáfu af Ópinu, þekktasta verki Munch, og aðra þekkta mynd sem nefnist Madonna. Þessi málverk eru enn ófundin. Árið 1994 var annarri útgáfu af Ópinu stolið úr Þjóðlistasafninu í Osló. Það kom hins vegar í leitirnar nokkrum mánuðum síðar. Að mati Interpol er um 60.000 listaverkum stolið á hverju ári en einungis 15 prósent þeirra komast aftur í hendur eigenda sinna. Eðli málsins samkvæmt er afar erfitt fyrir þjófa að koma jafn frægum verkum og Ópinu í verð og því reyna þeir oft að skila því til sinna fyrri eigenda gegn ríflegu lausnargjaldi. Norska ríkisútvarpið segir að algengt sé að málverk séu notuð sem skiptimynt í undirheimunum og þannig gangi þau manna á milli árum saman. Þar sem málverkin sem stolið var um helgina voru mun minna þekkt en Ópið var reiknað með að auðveldara yrði fyrir ræningjana að koma þeim í verð á svarta markaðnum.