Rooney og Van Nistelrooy voru frábærir

Sir Alex Ferguson var mjög ánægður með framgöngu leikmanna sinna í sigrinum á Aston Villa í ensku úrvalsdeildinni í dag og segir þá hafa brugðist vel við því að falla úr keppni í Meistaradeildinni. Sérstaklega hrósaði hann samvinnu Rooney og Van Nistelrooy.

"Mér fannst Wayne Rooney og Ruud Van Nistelrooy vera frábærir í dag. Þeir eru báðir frábærir leikmenn sem ná alltaf að finna leiðir til vinna saman og skapa færi. Leikmenn mínir hafa brugðist vel við því að detta úr Evrópukeppninni. Menn geta annað hvort sest niður og vælt eða gert eitthvað í því og mér finnst sem strákarnir séu staðráðnir í að gera gott úr þessu tímabili. Nú er bara að vona að Chelsea verði eitthvað á í messunni svo við eigum möguleika á að saxa á forskot þeirra," sagði Ferguson.