Skulda hverjum opinberum starfsmanni 2 milljónir

Hver einasti maður á almennum vinnumarkaði skuldar hverjum opinberum starfsmanni tvær milljónir króna í lífeyrisgreiðslur. Þetta er sú fjárhæð sem ríkið þarf að ná af almenningi með sköttum til að standa undir tvö hundruð milljarða króna lífeyrisskuldbindingu, sem engin innistæða er fyrir.

Nýjar skuldbindingar sem hlaðast á Lífeyrissjóð ríkisstarfsmanna á hverju ári nema ógnvekjandi háum tölum. Þannig bættust við nýjar skuldbindingar á síðasta ári upp á 24 milljarða króna. Ríkisendurskoðun vekur sérstaka athygli á slæmri stöðu sjóðsins í endurskoðun ríkisreiknings fyrir síðasta ár. Áfallnar lífeyrisskuldbindingar í B-deild Lífeyrissjóðs ríkisstarfsmanna námu um síðustu áramót 329 milljörðum króna. Eign á móti til greiðslu lífeyris nam hins vegar aðeins 135 milljörðum króna. Skuldbindingar umfram eignir námu 194 milljörðum króna. Þetta er það sem á myndi vanta ef sjóðnum hefði verið lokað um síðustu áramót. Skuldbindingar framreiknaðar miðað við að núverandi sjóðfélagar haldi áfram að ávinna sér réttindi til starfsloka nema hins vegar 234 milljörðum króna. Lífeyrissjóður hjúkrunarfræðinga er rekinn sjálfstætt og þar eru einnig hrikalegar tölur. Heildarskuldbinding umfram eignir framreiknuð nemur um 27 milljörðum króna.

Pétur Blöndal alþingismaður segir þetta fara vaxandi því laun hækki hjá opinberum starfsmönnum þar sem svokölluð eftirmannsregla valdi skuldbindingunum. Pétur kveðst hafa bent á fyrir nokkrum árum að opinberir starfsmenn mætu ekki lífeyrisréttindi sín í samanburði við aðrar stéttir. Á sínum tíma hafi þeir gleymt svona hlunnindum og réttindum.

Það er ljóst að hin mikla skuldbinding til að mæta lífeyrisréttindum opinberra starfsmanna mun hvíla þungt á skattþegnum landsins í nánustu framtíð. Pétur segir þó að ef góðærið og góð hagstjórn haldi áfram verði unnt að ráða þokkalega við þetta, en það gæti orðið erfitt ef kreppa kæmi.