ÖBÍ segir vinnureglur Tryggingastofnunar stangast á við lög

Forystumenn Öryrkjabandalagsins hyggjast leita á náðir dómsstóla varðandi skerðingu bóta um áttatíu öryrkja hætti Tryggingastofnun ekki við aðgerðir sínar. Þeir segja nýjar vinnureglur stofnunarinnar stangast á við lög. Enginn ástæða sé til þess að grípa til jafn harkalegra innheimtuaðgerða og nú er beitt gagnvart fársjúku fólki.

Eftir hávær mótmæli Öryrkjabandalagsins við þeirri ákvörðun heilbrigðisráðherra og Tryggingastofnunar að greiða um áttatíu öryrkjum engar bætur í nóvember og desember sökum ofgreiðslna yfir árið var ákveðið að greiða öryrkjunum grunnlífeyri að upphæð 22 þúsund krónur fyrir hvorn mánuð.

Þetta finnst forsvarsmönnum öryrkja ekki nóg þar sem venjan hafi verið að bætur séu ekki skertar meira en sem nemur 20 prósentum í hverjum mánuði þar til skuldin við Tryggingastofnun er að fullu greidd. Segja forsvarsmenn öryrkja að þótt grunnlífeyririnn verði greiddur sé enn verið að taka margfalt hærri upphæð af fólkinu en venjan er.

Sigursteinn Másson, formaður Öryrkjabandalagsins, segir að þar sem meðalbætur öryrkja eru nærri 80 þúsund krónum sé skerðingin mun meiri en 20%. Því hefur Öryrkjabandalagið nú ákveðið að vísa ágreiningnum við Tryggingastofnun og ráðherra til úrkskurðarnefndar almannatrygginga til að fá úr því skorið hvort nýtt vinnulag Tryggingastofnunar stangist ekki á við lagagrein almannatrygginga, sem segir að ekki megi skerða bætur meira en tuttugu prósent.

Segist Sigursteinn vonast eftir því að nefndin úrskurði í málinu í desember. Leggi hins vegar nefndin blessun sína yfir gjörning stjórnvalda í máli öryrkjanna verður farið lengra með málið og þá fyrir dómstóla. Það yrði þá í fimmta skiptið á jafn mörgum árum sem öryrkjar fara í mál við ríkið.