Reifst og skammaðist við dómarann

Saddam Hussein sagðist saklaus á fyrsta degi réttarhaldanna yfir sér. Hann lét dómarann fá það óþvegið og lenti í ryskingum við öryggisverði. Réttar-höldunum hefur verið frestað til 28. nóvember. Réttarhöldin yfir Saddam Hussein hófust í Bagdad í gær, í skrifstofum Baath-flokksins fyrrverandi á græna svæðinu svonefnda. Saddam mætti hnarreistur til leiks, bindislaus og í svörtum jakkafötum með Kóraninn í hönd. Hann er ákærður, ásamt sjö fyrrum samstarfsmönnum sínum, fyrir að hafa fyrirskipað fjöldamorð á 143 sjíum í bænum Dujail árið 1982. Hinir ákærðu gætu átt dauðadóm yfir höfði sér verði þeir fundnir sekir. Rizgar Mohammed Amin, kúrd-ískur aðaldómari réttarins, las sakborningunum ákærurnar en spurði svo Saddam hvort hann væri sýkn eða sekur. Eftir nokkurt þref hreytti Saddam út úr sér að hann væri ekki sekur. „Hver ertu eiginlega? Ég vil fá að vita hver þú ert," spurði hann Amin nokkru síðar og bætti því svo við að hann viðurkenndi ekki þennan „svokallaða dómstól" og hann áskildi sér öll réttindi sem forseti Íraks. Sjálfur vildi Saddam ekki staðfesta nafn sitt og brást síðan reiður við þegar Amin dómari sagði hann fyrrverandi forseta Íraks. Þegar hlé var gert á réttarhaldinu vildi Saddam sjálfur ganga úr vitnastúkunni en öryggisverðir reyndu að leiða hann á brott. Hann hristi þá reiður af sér, tuskaðist svo við þá í stutta stund og gekk síðan að lokum sjálfur út. Að hléinu loknu frestaði Amin dómhaldi til 28. nóvember. Írakar eru tvíbentir í afstöðu sinni til réttarhaldanna. „Síðan Baath-stjórninni var steypt af stóli höfum við beðið þessa dags," sagði Aqeel al-Ubaidi, íbúi í Dujail, í samtali við fréttamenn. „Dómstóllinn mun ekki færa okkur hina dánu aftur en að minnsta kosti slekkur hann reiðieldana sem brenna innra með okkur." Súnníar telja hins vegar Saddam skömminni skárri en núverandi valdhafa. „Hann einn er réttkjörinn leiðtogi Íraks," var einkunn Sahab Awad Maaruf frá Azamiyah-héraði þegar AP-fréttastofan leitaði álits hans.