Tveggja frambjóðenda barátta

Tuttugu og fimm flokkar bjóða fram í þingkosningunum í Þýskalandi, allt frá flokki bókstafstrúaðra kristinna til stjórnleysingjaflokksins. En baráttan stendur í raun á milli tveggja flokka - eða jafnvel bara tveggja frambjóðenda. Af öllum flokkunum eru það fimm - kannski sex - flokkar sem skipta einhverju máli og þar af eru það tveir flokkar sem eru þungavigtin í þýskum stjórnmála. Kristilegir demókratar, flokkur Helmuths Kohls og Angelu Merkel, og svo Jafnaðarmannaflokkur Gerhards Schröders, núverandi kanslara. Baráttan stendur reyndar einkum á milli þessara flokka og í forvígi eru formennirnir, Merkel og Schröder. Eftir sjö ár á kanslarastóli vita Þjóðverjar alveg hver Gerhard Schröder er. Jafnaðarmaður með einhverjum formerkjum, maður með góð tengsl við viðskiptalífið þrátt fyrir það og kanslari sem hefur lagt áherslu á að byggja upp ímynd sem sterkur leiðtogi á alþjóðavettvangi. Spurningin er miklu fremur: Hver er hún, Angela Merkel? David Eicher ímyndarsérfræðingur segir Merkel austurþýska sem sé ekki endilega jákvætt í augum hinna mörgu vesturþýsku kjósenda. Því reyni kristilegir demókratar að skapa samþýska ímynd af Merkel með áherslu á efnahagslífið. Eicher segir að Merkel hafi breytt ímynd sinni býsna oft undanfarið, en á hálfu ári hafi hún þrisvar skipt um hárgreiðslu og fólk taki eftir því. Hún sé að berjast fyrir því að finna réttu ímyndina en með þessu sýni hún einnig kænsku og glæsibrag sem kona sem hafi tekist að stíga í hin stóru fótspor Helmuths Kohls.