Samstarfi við Icelandair slitið

Forstjóri SAS segir í viðtali við danska viðskiptablaðið Börsen í morgun að öllu samstarfi við Icelandair um flug innan Skandinavíu verði slitið ef FL Group, móðurfélag Icelandair, kaupi Sterling-flugfélagið. Þrátt fyrir þetta leggja stjórnendur FL Group kapp á að ná samningum um kaup á Sterling, samkvæmt heimildum fréttastofunnar, en viðræður um kaupin hófust í gær. Að sögn heimildarmanna líta þeir annars vegar til þess að ferðanet félaganna skarast mjög lítið þannig að Icelandair myndi eflast mjög á Evrópumarkaði og Ameríkuflug Flugleiða að líkindum einnig vegna fjölgunar á viðkomustöðum í Evrópu. Hins vegar, að ef ekki yrði af kaupunum gætu Sterling og Iceland Express hæglega sameinast, enda í eigu sama eignarhaldsfélags, og Sterling auk þess hafið Ameríkuflug. Þar væri þá kominn flugrisi með öflugt flug á milli Íslands og Evrópu, öflugt net um alla Evrópu og Ameríkuflug jafnvel strax næsta sumar. Sá risi yrði þá í beinni samkeppni við Icelandair á nær öllum sviðum en það mun einmitt vera það sem stjórnendur FL Group vilja meðal annars koma í veg fyrir með kaupunum á Sterling. Dönsk blöð staðhæfa að þrír aðrir aðillar vilji kaupa Sterling og Berlinske Tidende hefur það eftir Pálma Haraldssyni, öðrum eiganda fjárfestingafélagsins Fons sem keypti Sterling, að leiðakerfi Sterling og Icelandair falli einstaklega vel saman. Blaðið rifjar einnig upp að hann hafi á sínum tíma verið í stjórn Flugleiða en ef af kaupunum verður má telja líklegt að Pálmi og félagar fái verulegan hluta andvirðist Sterling greiddan með hlutafé í FL Group og að Pálmi komist þannig aftur í stjórnina.