Verstu hamfarir í sögu BNA

Nú er talið að þúsundir hafi týnt lífi þegar fellibylurinn Katrín gekk yfir suðurströnd Bandaríkjanna. Uppbyggingarstarf gæti tekið áratugi. Þjófar láta greipar sópa á hamfarasvæðunum og ástandið einkennist af glundroða.Áhrifin af völdum fellibylsins Katrínar koma æ betur í ljós. Hamfarirnar eru einhverjar þær verstu í sögu Bandaríkjanna, bæði hvað varðar mannfall og eignatjón. Nú er ekki lengur talað um vikur eða mánuði í uppbyggingarstarf, því ljóst er að það mun taka mörg ár að koma hlutunum í samt lag á ný. Ástandið í Missisippi er víða svo slæmt að margir telja að stór hluti strandlengjunnar verði aldrei íbúðarhæfur aftur. Skip og bátar liggja á víð og dreif þar sem áður var íbúðarbyggð og vegir og brýr hafa gjöreyðilagst. Í New Orleans er allt við sama heygarðshornið og borgin er enn nær öll á kafi. Þótt ótrúlegt megi virðast voru meira en 200 þúsund manns enn í borginni um miðjan daginn og virðast margir hreinlega ekki hafa áttað sig á því að full þörf væri á að fara burt, jafnvel þó að fellibylurinn sjálfur væri genginn yfir. Ástandið í borginni hefur einkennst af glundroða í dag. Ræningjar vaða uppi, ofbeldi og glæpir hafa færst í vöxt og eins hefur verið kveikt í mörgum húsum. George W. Bush, forseti Bandaríkjanna, segir að ekki eigi að taka vægt á lögbrjótum sem fara um svæðið rænandi og ruplandi og skiptir þá engu máli hvort um er að ræða stuld á bensíni eða misnotkun á hjálparstyrkjum. Það bætti ekki úr skák að skotið var á Chinook herþyrlu við Superdome leikvanginn í dag og í kjölfarið var gert hlé á björgunaraðgerðum. Þúsundir lögreglumanna eyða dýrmætum tíma í að eiga við ræningja, þegar þörf er á þeim við björgunarstörf. Fjöldi fólks hefst enn við á húsþökum og björgunarsveitarmenn hafa að jafnaði flutt meira en sex hundruð manns í nauðum burt af svæðinu í allan dag. Heilu rútufarmarnir af fólki hafa verið fluttir burt, meðal annars til Houston, en yfirvöld þar hafa boðist til að taka við minnst 25 þúsund manns. Á meðan björgunarsveitarmenn keppast við að bjarga eftirlifendum gefst enginn tími til að flytja burt lík eða hefja hreinsunarstarf. Við það eykst hættan á smitsjúkdómum og öðrum fylgifiskum óhreininda. Nær ekkert drykkjarvatn er eftir í borginni og fimm milljónir manna á hamfarasvæðunum eru enn án rafmagns og annarrar grunnþjónustu. Enn er bara hægt að giska á mannfall af völdum Katrínar, en flestir virðast sammála um að fórnarlömbin skipti að minnsta kosti nokkrum þúsundum.