Tugþúsundir í miðbænum í dag

Tugþúsundir manna arka nú um miðbæ Reykjavíkur og fylgjast með fjölbreyttri dagskrá Menningarnætur. Gert er ráð fyrir allt að hundrað þúsund manns í miðbænum í kvöld. Dagskrá Menningarnætur hófst þegar Reykjavíkurmaraþonið var ræst í morgun. Menningin hefur bókstaflega blómstrað í allan dag á þessum stærsta menningarviðburði landsmanna. Í Ráðhúsinu var sérstök dönsk dagskrá þar sem aðalborgarstjóri Kaupmannahafnar var í heimsókn. Sif Gunnarsdóttir, framkvæmdastjóri Menningarnætur, var ánægð í upphafi dags. Sif sagði dagskrána mjög fjölbreytta og hún teldi að langflestir aldurshópar ættu að geta fundið eitthvað sem höfðaði til þeirra. Ingibjörg Sólrún Gísladóttir, fyrrverandi borgarstjóri, sagði aðspurð að sér liðið bara vel á Menningarnótt. Það væri gaman að sjá hversu mikið Menningarnóttin hefði sprungið út. Þegar byrjað hefði verið á henni hefði ekki verið á vísan að róa með það. Margir biðu spenntir eftir þjónahlaupinu þar sem þjónarnir hlupu með bakkana og full rauðvísglös. Joshua, einn þeirra sem tóku þátt í hlaupinu, sagði aðspurður að hlaupið hefði ekki verið svo erfitt. Það þyrfti bara að passa sig að hella mátulega í glösin. Spurður hvort þetta væri svona í vinnunni játti hann því og sagði það reyndar aðeins erfiðara því þar væri meira af fólki. Ungu kynslóðinni þótti spennandi að stíga á mótorhjól Félags Harley Davidson eigenda við Alþingishúsið og biðröðin var löng við draugahúsið í Tryggingamiðstöðinni. Gestir þar sögðu draugahúsið mjög skemmtilegt. Eins og síðari ár var boðið upp á heilgrillað naut frá Bautanum á Akureyri. Guðmundur Tryggvason á Bautanum sagði ef menn ætluðu að borða bolann með meðlæti mætti metta um 400 manns með honum en nú væri aðeins boðið upp á litla bita. Aðspurður hvenær hann hefði byrjað að grilla sagði Guðmundur að kveikt hefði verið undir nautinu klukkan sex í gærkvöldi. Dagskrán Menningarnætur lýkur svo með flugeldasýningu klukkan ellefu á hafnarbakkanum í Reykjavík og þá er búist við að eitt hundrað þúsund manns verði í miðbænum. Lögreglan mun rýma gatnamót til að hleypa umferðinni úr miðborginni, en það gekk mjög vel í fyrra. Lögreglan vill þó hvetja almenning til að nota strætó, þannig sé mun auðveldara að komast úr miðbænum.