Ekkert rafmagn þegar skólinn hefst

"Við vonum bara að það verði komið rafmagn þegar krakkarnir mæta í skólan í þarnæstu viku en kennararnir sem mæta nú á mánudaginn munu hinsvegar koma að skólanum rafmagnslausum," segir Guðmundur Þór Ásmundsson skólastjóri Laugarnesskóla. Í sumar hófst Orkuveitan handa við að leggja nýjar rafmagnslagnir en fyrirséð var að þær gömlu myndu ekki anna þeim tækjum sem notaðar verða í nýju mötuneyti skólans sem tekið verður í notkunn nú á haustönn. Vel gekk að koma nýju rafmagnslögnum fyrir þangað til í ljós kom að ekki hafði verið gert ráð fyrir vatnslögnum sem eiga að fara samhliða rafmagnslögnunum. Fyrir þremur vikum var svo lagst í að koma vatnslögnum fyrir og varð þá að taka rafmagn af byggingunni. Símasamband við skólan hefur verið strjált en þó hefur verið hægt að taka við einhverjum símtölum í gegnum farsíma. "Orkuveitan er að vinna að þessu hörðum höndum og vonandi verður rafmagn komið á þegar kennsla hefst eftir rúma viku," segir Þorkell Jónsson deildarstjóri mannvirkjaskrifstofu Reykjavíkurborgar. Miklar framkvæmdir eiga sér stað í Laugarnesskóla en verið er að reisa viðbyggingu og er ráðgert hún verði öll tilbúinn til vígslu haustið 2006. Það er að minnsta kosti hálfu ári seinna en upphaflega hafði verið gert ráð fyrir. Tafirnar eru til komnar vegna hönnunarbreytinga sem samþykktar voru á byggingarferlinu að sögn Þorkels. Viðamiklar breytingar verða svo gerðar á gömlu byggingunni og að sögn Guðmundar skólastjóra er gert ráð fyrir því að þeim verði lokið um haustið 2007. "Við fáum líka nota aðstöðuna í Laugarlækjarskóla á meðan á þessu stendur, maður verður líka að kíkja á björtu hliðarnar," segir Guðmundur sem tók við skólastjórninni um síðustu áramót. Forveri hans virðist líka hafa litið á björtu hliðarnar við þessar aðstæður en hann fór þess á leit við Orkuveituna að hún gerði smá frálögn á sjólögnina sem liggur um svæðið og flytur sjó í Húsdýragarðinn. Það verður því úr að stórt fiskibúr verður í nýju viðbyggingunni þar sem sjávarlífverur svamla í sjávarvatninu úr sjölögninni nemendum til gagns og gamans.