Vill fjölga yngri áhorfendum

Meðalaldur þeirra sem eiga árskort í Þjóðleikhúsinu er sextíu og tvö og hálft ár og fer hækkandi. Þeir, sem yngri eru, fá sér mun síður árskort. Þjóðleikhússtjóri segir að við þessu verði brugðist með aukinni fjölbreytni. Árskortasala hefur minnkað um rúmlega þriðjung á seinustu þremur árum. Tinna segir lítið hafa verið gert til þess að reyna að höfða til yngri aldurshópa en undanfarin þrjú ár hafa kortagestir elst um ár á ári. Tinna segir það ljóst að Þjóðleikhúsið hafi siglt lygnan sjó undanfarin ár og því verði að breyta. Þjóðleikhúsið sé jú sameign okkar allra og ekki gangi að aðeins fáir hópar hafi áhuga á því sem þar fari fram. Tinna segir enn fremur að eins og hún lesi úr stöðunni séu 75 prósent þeirra sem kaupi miða í Þjóðleikhúsið konur. Hún telji að sé hægt að sækja fleiri karlmenn í leikhúsið en fyrst og fremst meira af ungu fólki og hún muni leita leiða til þess. Tinna getur þó ekki nákvæmlega sagt til um hvernig hún ætli að leysa vandamál Þjóðleikhússins og segir vandamálið margþætt. Hún segir þó að til standi að stokka upp í leikarahópnum, hluti vandamálsins sé hversu einsleitur hópurinn er og það sjáist á áhorfendahópnum. Hún segir enn fremur að hún sjái fram á meiri sveigjanleika í leikararhópnum, sérstaklega eftir aðgerðirnar í marsmánuði. Hún ætli að reyna að breikka verkefnavalið og höfða meira til ungs fólks. Þá muni hún stuðla að því að auka þjónustuna á leikhúsinu og bæta aðgengismál auk veitingaþjónustu bæði fyrir og eftir sýningar. Þá verði fræðslustarf og barnastarf eflt til muna. Svo voni hún að fólk vilji koma og sjá þær sýningar sem boðið verði upp á. Tinna segir þó allt þetta kosta peninga, fjárhagsleg staða leikhússins sé slæm en er þó bjartsýn um að með meiri fjölbreytni sýninga muni fleiri áhorfendur koma í leikhúsið og þar af leiðandi muni fjárhagsstaðan batna.