Fischer og Spasskí leggja á ráðin

Boris Spasskí sem háði heimsmeistaraeinvígið við Bobby Fischer í Reykjavík árið 1972 kom til landsins klukkan fjögur í gærdag og fór hann rakleiðis á fund Bobby Fischer á Hótel Loftleiðum. Samkvæmt heimildum Fréttablaðsins voru þeir að ræða hugsanlegan stórviðburð þar sem teflt yrði eftir hinni svokallaðri random-aðferð en eins og kunnugt er hefur Fischer unnið að nýrri tegund taflmennsku þar sem hann telur atvinnutaflmennskuna hafa gengið sér til þurrðar, hún sé orðin of kerfisbundin og fyrirsjáanleg. Líklegt er talið að þessi viðburður verði hér á landi ef af honum verður. Frekari fregna er að vænta snemma í dag en Spasskí mun svo halda af landi brott síðdegis. Með Spasskí í Íslandsförinni er Joel Lautier, stofnandi Atvinnusambands stórmeistara, en hann á það sameiginlegt með Fischer að hafa gagnrýnt Alþjóðaskáksambandið harkalega. Af viðtölum við Lautier verður ekki annað séð en að hann sé Fischer sammála um að illa sé fyrir atvinnutaflmennskunni komið. "Þeir eru bara að spjalla og endurnýja kynnin," sagði Einar S. Einarsson sem tók á móti Spasskí og fylgdi honum á fund Fischers en þeir Spasskí og Fischer hafa ekki sést í ellefu ár. Einar segir að Spasskí hafi verið hress við komuna til landsins og að hann hafi lýst ánægju sinni með framtak Íslendinga við frelsun Fischers en hann taldi nokkuð víst að dauðinn hefði beðið skákmeistarans ef hann hefði verið framseldur til Bandaríkjanna. "Það er skondið að sjá kynslóðamuninn því við sem eldri erum vitum allt um Boris Spasskí en öðru máli gegnir um yngra fólkið, það sá ég greinilega þegar afgreiðslustúlka á hótelinu bað hann vinsamlegast að stafa nafnið sitt," sagði Einar kankvís. Einnig kom Alex Titomirov, stjórnarformaður líftæknifyrirtækisins Informax, með þeim Spasskí og Lautier en hann er annálaður skákáhugamaður. Helgi Ólafsson stórmeistari var einnig á fundi með köppunum á Hótel Loftleiðum í gær.