Borgin fær engan frest

Áfrýjunarnefnd samkeppnismála felldi úr gildi frest sem samkeppnisráð hafði veitt Reykjavíkurborg til að skipta upp starfsemi Upplýsingamiðstöðvar ferðamála og bjóða hluta af starfseminni út. Að öðru leyti staðfesti áfrýjunarnefndin úrskurð samkeppnisráðs. Áfrýjandi var Ferðaþjónusta Reykjavíkur ehf. sem vildi meina að Upplýsingamiðstöð ferðamála hefði ólöglega samkeppnisstöðu um bókanir á gistingu og þjónustu vegna opinberra styrkja frá Reykjavíkurborg. Samkeppnisráð féllst á rökstuðninginn og gerði Höfuðborgarstofu að bjóða út rekstur bókunarþjónustunnar. Borgin fór fram á frest til 1. október á grundvelli þess að vont væri að gera skipulagsbreytingar á háannatíma ferðaþjónustunnar. Samkeppnisráð veitti frestinn. Ferðaþjónusta Reykjavíkur ehf. áfrýjaði sem fyrr segir þeim úrskurði til áfrýjunarnefndar samkeppnismála sem felldi frestinn úr gildi og því ber Höfuðborgarstofu að hlíta úrskurði samkeppnisráðs að fullu fyrir 1. júlí og skilja að fullu á milli bókunarþjónustu og annarrar þjónustu.