Ryðja þurfti snjó á fjallvegum

Vinnuvélar Vegagerðarinnar eru ekki komnar í sumarfrí en ryðja þurfti Þorskafjarðarheiði og hreinsa snjó af fjallvegum á Austurlandi í morgun. Sumarveðrið lætur standa á sér og í sumum landshlutum var hreinlega vetrarfærð í morgun. Á Vestfjörðum þurfti að moka Þorskafjarðarheiði og hreinsa Steingrímsfjarðarheiði. Eins þurfti að hreinsa víða á Austurlandi eins og á Fjarðarheiði og Oddskarði og voru hálkublettir víða á Norðaustur- og Austurlandi. Jón Þórarinsson, varðstjóri á Egilsstöðum, segir ágætisfærð á láglendi en fjallvegir séu erfiðir yfirferðar sums staðar, hálka og krap. Aðspurður segir hann þessa færð óvenjulega á þessum árstíma. Spurður um það hvort fólks sé sektað sé það gripið á nagladekkjum nú segir Jón að lögreglan sé frekar treg til þess eins og ástatt sé en menn hafi átt að vera búnir að skipta yfir á sumardekk 15. apríl. Enginn umferðaróhöpp höfu orðið á Austurlandi klukkan fimm í dag og segir Jón ökumenn hafa verið til fyrirmyndar. Óli Þór Árnason, veðurfræðingur á Veðurstofu Íslands, segir hæð yfir Grænlandi valda því hversu svalt hefur verið en hún fer minnkandi smátt og smátt. Þó eru engin sérstök hlýindi fram undan. Fram að helgi verður hægur vindur á landinu öllu og 5 til 10 stiga hiti að deginum.