Byggingarstjóri er ekki skrautblóm

"Sumir telja að byggingarstjóri sé nánast eins og skrautblóm þegar kemur að byggingarfamkvæmdum og hann beri nánast enga ábyrgð. Ég tel það augljóst að byggingarstjóri ber mikla ábyrgð og ef fram koma gallar á húsnæði þá þarf hann að svara fyrir sig. Við höfum ekki mörg dómafordæmi en það eru að koma upp mörg mál núna," segir Sigurður Helgi Guðjónsson, hæstaréttarlögmaður og formaður Húseigendafélagsins. "Stóra vandamálið er það að til eru verktakar sem standa sig ekki. Þeir eru að skófla upp húsum og þá koma oft fram gallar eins og gengur og gerist þegar menn eru að flýta sér of mikið. Ég vil gjarnan horfa til fleiri þátta og sérstaklega til hins opinbera byggingareftirlits. Þar þarf að kanna hvort pottur sé ekki brotinn. Fólk á ekki að þurfa að annast mál af þessu tagi sjálft. Um svona mál á að vera alveg eins og í löggæslu almennt, lögreglan sér um að góma glæpamennina, ekki fólkið," sagði Sigurður.