Golfvellir flestir þokkalegir

"Korpan hefur aldrei komið jafn illa undan vetri og núna auk þess sem veðráttan æi maí hefur verið afar slæm," segir Margeir Vilhjálmsson, framkvæmdastjóri Golfklúbbs Reykjavíkur. Golfvellir í nánd við höfuðborgarsvæðið koma afar misjafnlega undan vetri og hefur vakið athygli að meðan golfvöllur GKG í Garðabæ virðist vera í afar góðu ásigkomulagi er ekki hið sama að segja um Hvaleyrina í Hafnarfirði þar sem flatir eru margar slæmar og brautir láta víða á sjá. Margeir segir að þrátt fyrir að nokkrir vellir líti verr út en búist var við séu þeir fleiri sem séu í þokkalega góðu ásigkomulagi. Grafarholtið sé að koma allsæmilega undan vetri. Golfvellirnir á Hellu og á Akranesi séu ágætir og sömu sögu má segja um Hólmsvöll þeirra Suðurnesjamanna. Fyrsta stigamót sumarsins á Toyota mótaröðinni fer einmitt fram á Strandavelli við Hellu um næstu helgi. Sá völlur er talinn bærilegur eins og sakir standa og vonast er til að hann verði orðinn góður þegar mótið hefst.