Nýir tímar í sjávarútvegi

Íslendingar eru í auknum mæli að nýta sér reynslu úr sjávarútvegi til að tryggja sér sæti í efnahagshraðlestinni í Kína. Eva Bergþóra Guðbergsdóttir er í fylgdarliði forsetans í austurvegi. Á Íslandi hefur lítið verið fjallað um fyrirtækið Atlantis sem verslar með fisk í þrettán löndum. Það er að stærstum hluta í eigu Íslendinga en búist er við að ársveltan verði um 250 milljónir bandaríkjadala sem samsvarar hátt í tveimur milljörðum króna. Í dag náðu forsvarsmenn fyrirtækisins mikilvægum samningi um byggingu risafrystigeymslu í Kína. Óli Valur Steindórsson, forstjóri Atlantis, segist ekki geta sagt til um á þessari stundu hversu stór hún verði en vonast eftir því að hún verði sem stærst. Íslensk þekking á sjávarútvegi er orðin að sérstakri auðlind. Sjóvík lætur t.a.m. vinna fisk í fimm fiskvinnsluhúsum í Kína. Þar er meðalaldur fiskvinnslukvenna um 22 ár en þær koma utan að landi til að vinna í fiski og senda svo peningana heim til fjölskyldna sinna. Fyrir tíu tíma vinnudag, sex daga vikunnar, fá þær 100 dollara á mánuði. Ólafur Ragnar Grímsson, forseti Íslands, segir nýja tíma í íslenskum sjávarútvegi: veiðarnar fari fram í Rússlandi, vinnslan fari fram í Kína og svo séu afurðirnar seldar á hágæðamarkaði í Bandaríkjunum og Bretlandi.