Trampólín nýjasta æðið

Trampólín eru nýjasta æði Íslendinga og hafa þau selst í hundraðatali upp á síðkastið. Í gær seldust 60 slík tæki þegar ný verslun Húsasmiðjunnar var opnuð í Grafarvogi. En samfara auknu hoppi hefur komum á slysadeildina fjölgað. Fjaðursegl, eins og trampólín hafa verið nefnd á íslensku, eru svo sannarlega vinsæl hér á landi um þessar mundir. Þau eru orðin algeng sjón í görðum um þessar mundir og krakkar safnast saman í kringum þessi vinsælu leiktæki. Það er þó ekki sama hvar leiktækin eru staðsett eða hvernig þeim er viðhaldið. Komum á slysadeildina hefur fjölgað vegna slysa á trampólínum að sögn Steinunnar Jónsdóttur, sérfræðings á slysadeild Landspítalans. Og það er kannski ekki skrýtið að slysum á trampólínum hafi aukist því þau hafa beinlínis rokið út úr verslunum, m.a. í Europris. Þar hafa þau selst í hundraðatali en öryggisnet, sem æskilegt er að fylgi þeim, aðeins í tugatali. Öryggisnetið er strengt í kringum trampólínið til að varna því að krakkarnir detti út af því. Það getur verið gott að hafa öryggisnetið því krakkar úr götunni koma oft og hoppa í garði á öðru heimili en sínu eigin, t.d. í garðinum hjá Sigurði Jack. Hann segist aðeins vita um eitt slys samfara hoppinu þegar drengur tognaði í fyrra. Það gilda strangar reglur um notkunina á trampólíninu í garðinum hjá Sigurði. Krakkarnir þurfa að biðja um leyfi til að fá að leika sér á því og það er alltaf fylgst með því. Og Sigurður segir nauðsynlegt fyrir foreldra að vera meðvitaða um ábyrgðina sem fylgir því að eiga slíkt tæki. Steinunn segir að slys þeirra sjúklinga sem hafa komið til meðferðar á slysadeildina séu margvísleg. Inn á heimasíðu Lýðheilsustöðvar er hægt að nálgast öryggisleiðbeiningar um notkun trampólína. Í Noregi er mælt með því að fólk noti öryggisnet sem strengd eru í kringum trampólín. Herdís Storgaard, verkefnisstjóri Árvekni, segir mikilvægt að fólk hugi að öryggismálum vegna trampólína og að aldrei séu fleiri en einn krakki að hoppa í einu á trampólíninu.