Miklir sinueldar í dag

Miklir sinueldar hafa logað á höfuðborgarsvæðinu í dag og þurfti meðal annars dælubíla frá slökkviliðinu til að slökkva eldana. Veðurfarið á stóran þátt í auknum sinueldum því upp á síðkastið hefur verið mjög kalt og þurrt. Slökkviliðsmenn hafa í dag barist við sinuelda á tveimur stöðum í höfuðborginni. Sá fyrri kviknaði við Urriðaholt í Garðabænum rétt fyrir þrjú og um stundarfjórðungi síðar var tilkynnt um sinueld á Rjúpnahæð við Vatnsenda. Í báðum tilfellum beinist grunur að því að eldurinn hafi kviknað eftir fikt. Um fimmleytið börðust slökkviliðsmenn enn við eldinn á Rjúpnahæð og sagði Friðrik Þorsteinsson, stöðvarstjóri slökkviliðs höfuðborgarsvæðisins, í samtali við fréttastofu að tjónið væri mikið. Gróðurskemmdirnar séu miklar sem verða af völdum eldsins og það taki mosann marga áratugi að ná sér á strik aftur. Tíminn framundan sé hættulegur því áfram sé spáð þurru veðri og þá þurfi lítið til að kveikja í sinunni. Friðrik segir það nauðsynlegt fyrir foreldra að þeir brýni fyrir börnum sínum hve sinueldar geti verið hættulegir. Það sé bæði hætta á því að eignir skemmist og að fólk geti hreinlega lokast inni í eldhafinu sem myndast getur þegar slíkir eldar eru kveiktir.