Varð vélarvana við Garðskaga

Tvö hundruð og fimmtíu tonna hollensku skipi var bjargað þegar það varð vélarvana um hálfa mílu suðsuðvestur af Garðskaga um sjöleytið í gærkvöldi. Skipið er á hnattsiglingu og heldur héðan áleiðis til Grænlands. Skipið, sem kallast Daphne, var á leið frá Vestmannaeyjum til Keflavíkur þegar drapst á vélunum, en fimm manns eru í áhöfn þess. Mikill vindur var á svæðinu og slæmt í sjóinn og var skipið komið mjög nálægt landi. Guðmundur Ólafsson, einn björgunarsveitarmanna í aðgerðinni, segir það hafa gengið ágætlega að draga skipið að landi en barningur til að byrja með. Skipið er í hnattsiglingu og kom hingað frá Skotlandi. Það lagði upp frá belgísku borginni Brugge. Næsti áfangastaður er svo Grænland. Aðspurður hvort hann hefði verið hræddur segir skipstjórinn, Toon Van Riel, svo ekki vera, enda hefði hann borið fullt traust til Íslendinganna.