Fann sprautu í strætisvagni

Sprauta sem líklega hefur verið notuð til fíkniefnaneyslu fannst í strætisvagni í gærkvöldi. Strætóbílstjórinn ætlar að tilkynna sprautufundinn til lögreglunnar. Sprautan fannst í strætisvagni númer 15 sem keyrir frá Hlemmi í Grafarvoginn. Eftir vaktina gekk Ríkharður Utley frá vagninum og hann fann sprautuna í ruslatunnu sem er aftast. Ríkharði var að vonum brugðið. Hann segist aldrei hafa fundið slíkt í vagni sínum áður. Og Ríkharður hefur tvo ákveðna menn grunaða. Hann veit þó ekki hvort þeir hafi sprautað sig inni í vagninum sjálfum. Hann segir annan þeirra hafa verið í þannig ásigkomulagi þegar hann kom inn að hann gæti hafa verið í vímu. Ríkharður gerir ráð fyrir að tilkynna þetta til lögreglunnar.