70% Ísfirðinga í góðum málum

Sjö af hverjum tíu íbúum Ísafjarðarbæjar telja andlega og líkamlega heilsu sína góða eða mjög góða. Þetta kemur fram í niðurstöðum heilsufarskönnunar sem gerð var í bæjarfélaginu í vetur og greint er frá á vef Bæjarins besta. Samkvæmt könnuninni eru íbúar sveitarfélagsins nokkuð virkir hvað hreyfingu varðar. „Flestir íbúar fara út að ganga, fara á líkamsræktarstöð eða synda þegar þeir stunda hreyfingu. Mjög misjafnar skoðanir voru á aðstöðu til heilsueflingar. Ísfirðingar voru á sama máli um að sundlaugaaðstöðu þyrfti að bæta en 93,7% íbúa gáfu sundlauginni einkunn undir 8. Á Suðureyri, Flateyri, Þingeyri eða í nærsveitum voru 77% sem gáfu aðstöðu til útivista undir 8,“ segir í niðurstöðum lokaverkefnis til BS-prófs í íþróttafræði sem Anna Soffía Sigurlaugsdóttir og Sigríður Guðjónsdóttir gerðu á grundvelli heilsufarskönnunarinnar. Verkefni Önnu og Sigríðar verður kynnt á almennum borgarafundi um heilsueflingu í Ísafjarðarbæ sem haldinn verður í Stjórnsýsluhúsinu á Ísafirði klukkan á þriðjudagskvöldið. Auk kynningar á niðurstöðum skýrslunnar verður kynnt verkefnið „Allt hefur áhrif“ þar sem lögð er áhersla á bætt líferni barna og foreldra.