Björguðu hollensku skipi

Tvö hundruð og fimmtíu tonna hollensku skipi var bjargað þegar það varð vélarvana um hálfa mílu suðsuðvestur af Garðskaga um sjöleytið í gærkvöldi. Samkvæmt fyrstu heimildum fréttastofunnar var um skip í eigu Grænfriðunga að ræða en svo reyndist ekki vera. Skipið, sem kallast Daphne, var á leið frá Vestmannaeyjum til Keflavíkur þegar drapst á vélunum en fimm manns eru í áhöfn þess. Mikill vindur var á svæðinu og slæmt í sjóinn. Tvö skip voru á svipuðum slóðum og sneri Kiddi Lár frá Sandgerði skipinu og Sæmundur GK tók það í tog og kom til Sandgerðishafnar stundarfjórðungi fyrir níu í gærkvöldi. Daphne er á heimssiglingu og lagði skipið upp frá belgísku borginni Brugge ekki alls fyrir löngu. Þegar viðgerðum lýkur heldur skipið til Grænlands.