Alcan vísar ásökunum á bug

Alcan í Straumsvík vísar á bug ásökunum um að ólöglega hafi verið staðið að uppsögnum fimm starfsmanna. Fyrirtækið segir að ákvæði kjarasamninga hafi ekki verið brotin. Trúnaðarráð verkalýðsfélaga starfsmanna í álveri Alcans í Straumsvík hefur mótmælt harðlega tilefnislausum uppsögnum fimm starfsmanna álfyrirtækisins og er sérstaklega gagnrýnt að starfsmönnunum hafi verið vísað fyrirvaralaust af vinnustað. Engar ástæður hafi verið gefnar fyrir uppsögnunum þótt eftir þeim hafi verið leitað. Telur trúnaðarráðið þessa framkomu stjórnenda fyrirtækisins valda miklum ugg hjá öðrum starfsmönnum varðandi atvinnuöryggi. Í yfirlýsingu sem Alcan í Straumsvík hefur sent frá sér segir að uppsagnirnar tengist ekki á nokkurn hátt innbyrðis og er getgátum um slíkt algerlega vísað á bug. Löglega hafi verið staðið að þessum fimm óskyldu málum og ákvæði kjarasamningi hafi ekki verið brotin. Hjá Alcan í Straumsvík starfa um 500 manns. Segir í yfirlýsingunni að sem betur fer séu uppsagnir fátíðar en á stórum vinnustað geti þó komið upp aðstæður þar sem starfsmaður eigi ekki samleið með fyrirtækinu, og því miður hafi í einstökum tilfellum komið til uppsagnar.