Vilja einn rétt og ekkert svindl

Einn réttur - ekkert svindl er yfirskrift 1. maí í Reykjavík. Þar er vísað til ólöglegs innflutts vinnuafls og réttinda sem tryggð eiga vera í samningum. Um allt land fara fram hátíðahöld í tilefni dagsins en í Reykjavík stendur fulltrúaráð verkalýðsfélaganna í borginni, BSRB, BHM, Kennarasambandið og Iðnnemasambandið fyrir dagskrá. Í yfirlýsingu frá þeim segir að stéttarfélög hafi sjaldan haft mikilvægara hlutverki að gegna en í dag og að verkefni þeirra hafi sjaldan verið umfangsmeiri. Þar er vísað til hnattvæðingarinnar, aukinnar markaðsvæðingar og stórfellds styrks fjármagnseigenda þar sem valdið hlaðist sífellt á færri hendur og teygi sig út fyrir mörk og íhlutunarrétt þjóðríkja. Undanfarin misseri hafi verið mikil brögð að því að atvinnurekendur notist við ólölegt erlent vinnuafl. Því sé brýnt að lög um útlendinga og réttindi þeirra verði samræmd um leið og sett verði lög um starfsmannaleigur. Þar verði kveðið á um að starfsfólk sem vinni hér taki laun eftir íslenskum kjarasamningum og njóti þeirra réttinda sem hér ríkja. Þá segir að ítalska verktakafyrirtækið Impregilo hafi sótt að kjörum, réttindum og aðbúnaði verkafólks við Kárahnjúka. Áhrifin þaðan hafi síðan breiðst út og fyrsta bylgjan þegar skollið á höfuðborgarsvæðinu í lægra kakupi og kjörum í byggingariðnaði og víðar. Frammi fyrir þessu standi ráðvilltir stjórnmálamenn og vekburða embættismannakerfi. Baráttan við Impregilo sýni gildi öflugra stéttarfélaga og þar megi ekki láta deigan síga. Í Reykjavík verður safnast saman á Skólavörðuholti klukkan eitt og gengið undir lúðrablæstri tveggja lúðrasveita að Ingólfstorgi þar sem útifundur hefst klukkan 14:10. Þar verður tónlist í boði og fyrsti varaformaður Eflingar, formaður BSRB og formaður Iðnnemasambandsins flytja ávörp. Þá ætla femínistar að vera áberandi í göngunni með sinn bleika lit. Iðnnemar, Bandalag íslenskra námsmanna og Samband íslenskra námsmanna erlendis verða með hátíð í Fjölskyldu- og húsdýragarðinum þar sem aðgangur er ókeypis og ýmislegt til skemmtunar. Sniglarnir, Bifhjólasamtök lýðveldisins, verða með hópkeyrslu frá Kaffivagninum á Granda klukkan 14.20. Og er þá aðeins fátt nefnt.