Konur og börn hálshöggvin

Lík 41 Íraka hefur fundist síðastliðna tvo daga og er greinilegt að fólkið hefur verið tekið af lífi. Meðal hinna látnu eru bæði konur og börn. Á þriðjudaginn fundust 26 lík á akri nærri borginni Qaim í vesturhluta landsins. Líkin voru öll sundurskotin og virtust þau hafa legið á akrinum í nokkra daga. Fólkið var allt í borgaralegum klæðum og var ein kona þar á meðal. Ekki er vitað um nein deili á þessu fólki. Sama dag fundu íraskir hermenn lík tíu karla, þriggja kvenna og tveggja barna í bænum Latifiya sem er skammt sunnan við Bagdad. Fólkið hafði allt verið hálshöggvið. Að sögn írasks embættismanns er talið að karlmennirnir hafi fyrir tveimur vikum skráð sig í íraska herinn en uppreisnarmenn hafi síðan rænt þeim. Hryðjuverk héldu áfram í Írak í gær sem aldrei fyrr. Sjálfsmorðsprengjuárás var gerð fyrir framan hótel sem margir Vesturlandabúar dvelja á. Þrír fórust í tilræðinu auk árásarmannsins. Útsendarar al-Kaída í Írak hafa þegar sagst bera ábyrgð á árásinni á hótelið sem þeir kalla "hótel gyðinganna".