Bush lofar rannsókn á skotárás

George Bush Bandaríkjaforseti lofaði í morgun, að kröfu Silvios Berlusconis, forsætisráðherra Ítalíu, opinberri rannsókn á því hvernig það gat gerst að bandarískir hermenn í Írak skutu á bíl með ítölskum gísl sem nýbúið var að leysa úr haldi. Einn lést í árásinni. Blaðakonan Giuliana Sgrena hafði verið í haldi mannræningja í Írak í um mánuð. Ítalskur öryggissérfræðingur, Nicola Calipari, hjálpaði við að fá hana lausa. Þegar keyrt var með Sgrena í átt að bækistöðvum Bandaríkjahers í Írak rétt eftir að hún hafði verið látin laus hófu bandarískir hermenn að skjóta á bílinn með þeim afleiðingum að Calipari lést og Sgrena særðist ásamt tveimur ítölskum öryggissérfræðingum sem voru í bílnum. Talsmaður Bandaríkjahers segir að bíllinn hafi nálgast vegatálma hersins á miklum hraða og því verið talinn grunsamlegur. Hermennirnir hafi gefið merki með höndum, blikkað ljósum og skotið viðvörunarskotum en síðan hafi þeir skotið á vél bílsins. Ítalskar fréttastofur greina frá því að Calipari hafi hent sér yfir Sgrena til að vernda hana þegar skotárásin hófst. Sgrena hefur verið útskrifuð af sjúkrahúsi. Hún kom til Ítalíu í morgun og var fagnað ákaft. Berlusconi, forsætisráðherra Ítalíu, mætti einnig á flugvöllinn til að taka á móti henni en hann hefur átt erfitt með að fá landa sína til að sætta sig við að í Írak eru 3000 ítalskir hermenn og reglulega eru mótmæli götum úti gegn Íraksstríðinu. Berlusconi kallaði eftir skýringum frá Bush sem hringdi í Berlusconi, harmaði atburðinn og hét ítarlegri opinberri rannsókn á því hvernig þetta hefði getað gerst. Það var lítt þekktur hryðjuverkahópur sem sagðist hafa rænt Sgrena og krafðist þess að Ítalir færu með hermenn sína frá Írak. Sami hópur sagðist í september hafa tekið af lífi tvo ítalska hjálparstarfsmenn en þeim var seinna sleppt.