Chelsea hélt ekki út á Camp Nou

Barcelona sigraði Chelsea 2-1 á Camp Nou í 16-liða úrslitum Meistaradeildarinnar í kvöld. Chelsea komst yfir í fyrri hálfleik eftir að Belletti stýrði fyrirgjöf Damien Duff í eigið net. En kaflaskipti urðu í leiknum á 56. mínútu er Didier Drogba fékk sitt annað gula spjald sem var vægast sagt umdeildur dómur. Drogba fór með löppina í bolta sem Victor Valdes, markvörður Barca, fór útí og vildi Anders Frisk dómari meina að Drogba hefði farið með löppina í Valdes, en endursýning sýndi að svo var ekki. Eftir þetta tók Barcelona öll völd á vellinum og á 67. mínútu skoraði varamaðurinn Maxi Lopez í sínum fyrsta Meistaradeildarleik og sjö mínútum síðar lagði hann  upp mark fyrir Samuel Etoo. Eiður Smári byrjaði á tréverkinu hjá Chelsea en kom inná fyrir Damien Duff á 76. mínútu.