Syrgja Hariri á götum úti

Stuðningsmenn Rafiks Hariris, fyrrverandi forsætisráðherra Líbanons, sem lét lífið þegar öflug bílsprengja sprakk í miðborg Beirútar í dag, fara nú hrópandi um götur borgarinnar til að láta í ljós reiði sína og sorg vegna tilræðisins. Alls fórust tólf manns og tugir slösuðust þegar sprengjan sprakk í sömu andrá og bílalest forsætisráðherrans fyrrverandi ók hjá. Yfirvöld í Líbanon telja að sprengjan hafi átt að granda ráðherranum fyrrverandi en meðal þeirra sem létust einnig voru nokkrir lífvarða hans. Að minnsta kosti tuttugu bifreiðar stóðu í ljósum logum eftir sprenginguna og nærliggjandi hús skemmdust mikið. Tilræðið hefur vakið ótta um að ný og blóðug ofbeldisalda kunni að rísa í landinu en ítök Sýrlendinga í innanríkismálum eru mjög umdeild. Hariri sem var almennt álitinn einn af áhrifamestu stjórnmálamönnum sinnar samtíðar í Líbanon og hafði nýlega tekið undir kröfur um að sýrlenskrar hersveitir yrðu kallaðar heim frá Líbanon. Sýrlensk yfirvöld hafa fordæmt tilræðið en óþekktur hópur íslamskra öfgamanna lýsti ábyrgð á verknaðinum á hendur sér. Fréttir af því eru hins vegar enn óljósar.